2Cor 11 | BOJ | STEP | Niŋgi e odbibqa e olo nanari anjam kiñala merŋgwai. Niŋgi e odbqa kereamqa e odbiye.

2 Corinthians 11

Tamo qudei naŋgi gisaŋoqnsib Qotei aqa wau tamo buleqnub

1 Niŋgi e odbibqa e olo nanari anjam kiñala merŋgwai. Niŋgi e odbqa kereamqa e odbiye. 2 Qotei aqa tamo uŋgasari naŋgi a segi qujai tulaŋ qalaqalaiyoqnsib aqa sorgomq di sqajqa deqa a tulaŋ siŋgilaeqnu. Dego kere e dego niŋgi Kristus dauryqajqa tulaŋ siŋgilaeqnum. E segi nami niŋgi osim Kristus yonam a na niŋgi eleŋej. Deqa tamo bei na aqa duŋge nami tamo bei wo anjamosai qaji di osim tamo qujai yim a na oqas dego kere mondoŋ e niŋgi olo osiy Kristus yitqa a na niŋgi torei oqas. 3 Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum. 4 E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

5 Niŋgi are qaleb, “Tamo naŋgi di Qotei na bole qariŋnjrej.” Sai. Niŋgi quiye. Tamo naŋgi dena e buŋbosai. Tamo naŋgi di ñam ti unub ariya e dego ñam ti unum. 6 E anjam marqajqa medabu gulubeibeqnu di uŋgum. E powo qa truquosaieqnum. Agi ijo kumbra kalil e nuŋgo ambleq di yoqnem qaji di niŋgi unoqnsib dena poiŋgoqnej, e powo koba ti unum.

7 Niŋgi qalie, e Qotei aqa anjam bole niŋgi merŋgoqnem di e laŋa merŋgoqnem. E awai bei niŋgi yaiŋgosaioqnem. Ijo kumbra dena e ijo segi ñam aguq atoqnem. Yim nuŋgo ñam olo goge oqwajqa deqa. E kumbra di yoqnem di une e? Sai. 8 E Kristen tamo uŋgasari qure bei beiq di unub qaji naŋgoq dena silali oqnem. Osim dena e nuŋgo ambleq di laŋa wau yoqnem. Ijo kumbra dena e naŋgo silali bajiŋobuloqnem. 9 E nuŋgo ambleq di sosimqa e iŋgi iŋgi qa truquoqnsimqa e deqa tamo bei gulube yosaioqnem. Kristen was qudei Masedonia sawaq dena Korin qureq beleŋeb qaji naŋgi na e taqatbosib iŋgi iŋgi qa aqaryaiboqneb. E niŋgi gulube eŋgwajqa tulaŋ uratoqnem agi bini e degsim unum. 10 Kristus aqa anjam bole ijoq di unu deqa e anjam bole endegsi merŋgwai, Akaia sawa kalilq dia tamo bei na e ijo kumbra deqa ijo segi ñam soqtqajqa getentbqa keresai. 11 E kiyaqa ijo segi ñam soqteqnum? E niŋgi qalaqalaiŋgosaieqnum deqa kio e ijo segi ñam soqteqnum? Deqa sai. Qotei a qalieqo, e niŋgi tulaŋ qalaqalaiŋgeqnum.

12 Ariya tamo qudei naŋgi naŋgo segi ñam soqtqajqa gam ŋameqnub. Yim naŋgi tamo kalil naŋgo ŋamgalaq di iga bul sqajqa deqa. Ariya e na olo naŋgo gam di getentetnjrqajqa waueqnum. E degyoqnsiy sqai. 13 Tamo naŋgi di Qotei na qariŋnjrosai. Naŋgi wau tamo bolesai. Naŋgi gisaŋoqnsib naŋgo segi kumbra bulyoqnsib tamo bole buleqnub. Yim tamo uŋgasari naŋgi unsib marqab, “Naŋgi Kristus aqa wau tamo bole.” 14 O was qu, niŋgi naŋgo kumbra di unsib niŋgi deqa tulaŋ prugaib. Iga qalie, Satan a dego gisaŋoqnsiqa aqa kumbra bulyoqnsiqa Qotei aqa laŋ aŋgro bole riaŋ ti unub qaji naŋgi buleqnu. 15 A kumbra degyeqnu deqa aqa wau tamo naŋgi dego naŋgo kumbra bulyoqnsib tamo naŋgi kumbra bole dauryoqnsib waueqnub qaji naŋgi buleqnub. Iga deqa tulaŋ prugwasai. Mondoŋ Qotei na tamo naŋgi di naŋgo kumbra deqa kambatnjrsim awai ugedamu enjrqas.

Pol a Qotei aqa wau ojsiq deqa a gulube gargekoba itoqnej

16 E nami maronum, e nanari anjam kiñala merŋgwai. Ariya merŋgit niŋgi qusib e nanari tamo edegaib. Niŋgi e nanari tamo edegwab di kere. Ariya niŋgi e odbibqa e ijo segi ñam olo yala soqtqai. 17 E Tamo Koba Yesus aqa areqalo dauryosim anjam endi marosai. E nanari tamo bulosim deqa e anjam endi maroqnsim ijo segi ñam soqteqnum. 18 Tamo gargekoba naŋgi mandam endeqa kumbra dauryoqnsib naŋgo segi ñam soqteqnub. Deqa e dego kumbra di dauryosiy ijo segi ñam yala soqtqai.

19 Niŋgi segi qa mareqnub, “Iga powo koba ti unum.” Maroqnsib deqa niŋgi nanari tamo naŋgi odnjreqnabqa naŋgi nanari anjam niŋgi merŋgeqnub. 20 Nuŋgo kumbra agiende. Tamo bei na niŋgi ojsim wau koba eŋgimqa kio nuŋgo iŋgi iŋgi saitimqa kio nuŋgo iŋgi iŋgi gisaŋ na yaiŋgimqa kio aqa segi ñam soqtimqa kio nuŋgo ula poŋyimqa kio niŋgi a odyibqa aqa segi areqalo dauryoqnsim degyoqnqas. 21 O was qu, iga siŋgila saiqoji unum deqa kumbra naŋgi niŋgi eŋgeqnub qaji di iga niŋgi eŋgwa keresai. E gago une deqa niŋgi merŋgonum deqa e jemaibqo.

Ariya tamo qudei naŋgi naŋgo segi kumbra ubtsib marqajqa siŋgilaeqnub deqa e kamba dego ijo segi kumbra ubtsiy marqai. O was qu, e nanari tamo bulosim deqa anjam mareqnum. 22 Tamo naŋgi di mareqnub, “Iga Hibru tamo.” Ariya e dego Hibru tamo. Naŋgi mareqnub, “Iga Israel tamo.” E dego Israel tamo. Naŋgi mareqnub, “Iga Abraham aqa leŋ.” E dego Abraham aqa leŋ. 23 Naŋgi mareqnub, “Iga Kristus aqa wau tamo.” Ariya e nanari tamo bulosiy anjam endegsi marqai. E dego Kristus aqa wau tamo. Agi e na tamo naŋgi di tulaŋ buŋnjrsimqa ŋes na ti jaqatiŋ na ti Kristus aqa wau ojeqnum. Bati gargekoba jeu tamo naŋgi na e tonto talq di waiboqneb. Osib e lubogargekobatoqneb. Gulube dena e na tamo naŋgi di tulaŋ buŋnjroqnem. Bati gargekoba e moiqa jojomem. 24 Bati 5-pela Juda tamo naŋgi na e kumbaiŋbo 39 toqneb. 25 Bati qalub naŋgi bu toqoŋ na e luboqneb. Bati qujai naŋgi na e moiotbqa marsib meniŋ na luboqneb. Bati qalub e qobuŋ na gileqnam qobuŋ a padalej. Qobuŋ padalonaq qolo ti qanam ti e yuwalq di otosi laqnem. 26 Bati gargekoba e sawa isaq siŋga na walweloqnem. Ya koba doqnsiqa e ya na padaltbqa jojomoqnej. E gamq di walweleqnamqa bajiŋ tamo naŋgi gam getentoqnsibqa e lubqa laqneb. Juda tamo naŋgi ti sawa bei bei qaji tamo naŋgi ti dego e lubqa laqneb. Qure qureq dia, wadau sawaq dia, yuwalq dia dego e padalqa jojomoqnem. Gisaŋ Kristen naŋgi na dego e ugeugeibqa laqneb. 27 E ŋes na ti jaqatiŋ na ti waukobaoqnem. Qolo gargekoba e waukobaoqnsim ŋeiosaioqnem. E mam ti laqnem. E ya qarboqnej. Bati gargekoba e iŋgi saiqoji soqnem. Bati gargekoba e yorbeqnaqa e ijo jejamu kabutqajqa gara saiqoji soqnem. 28 Ariya bini gulube qudei dego e qa branteqnub. Gulube kobaquja bei agiende. E bati gaigai Kristen was qu qure qure kalilq di unub qaji naŋgi qa are koba qaleqnum. Naŋgi bole unub kio sai kio deqa e naŋgi qa tulaŋ are koba qaleqnum. 29 Deqa Kristen was bei aqa siŋgila saiamqa e was deqa are koba qalsiy e segi dego siŋgila saibqas. Iŋgi bei na Kristen was bei a uneq waiyimqa e was deqa are koba qalsiy are ugeibqas.

30 E gam bei saibqas di e ijo segi ñam soqtqai. Ariya gulube kalil e qa beqnub qaji dena niŋgi osorŋgeqnu, e siŋgila saiqoji. E deqa marqai. Osiy ijo ñam soqtqai. E iŋgi bei qa ijo ñam soqtqasai. 31 Tamo Koba Yesus aqa Abu Qotei a qalie, e anjam bole maronum. E gisaŋosai. Deqa iga bati gaigai aqa ñam soqtoqnqom. 32 Damaskus qureq dia Mandor Koba Aretas a na qure taqato qaji tamo koba a minjnaqa a na qoto tamo qudei naŋgi qariŋnjrnaqa naŋgi na qure aqa siraŋme kalil taqatoqneb. Di kiyaqa? E ulaŋqa laqnitqa naŋgi na e ojsib tonto talq di waibqajqa deqa. 33 Ariya Kristen was qudei naŋgi na e aqaryaibosib gumbaq di jigsib qure aqa jeŋ gogetosib sil na gumba tontosib jeŋ aqa siraŋme kiñalaq dena e ura uratbonab jeŋ oqeq aiem. Kumbra dena e qure taqato qaji tamo koba aqa baŋq dena ulaŋem.